कर्तव्यनिष्ठतेचा सन्मान – अक्कलकोटचे सिनीअर पोलीस निरीक्षक राजेंद्र टाकणे अप्पर पोलीस उपायुक्त पदावर !

लेखन प्रकार – स्तंभलेख

   सातारा जिल्ह्यातील; माण तालुक्यात, श्रीक्षेत्र ‌म्हसवड गावाचा अभिमान आणि पोलीस दलातील धडाडीचा चेहरा, सिनीअर पोलीस निरीक्षक राजेंद्र टाकणे यांना नुकतीच नांदेड येथे अप्पर पोलीस उपायुक्त (राज्य गुप्तवार्ता) पदावर बदलीसह पदोन्नती मिळाली आहे. ही बढती त्यांच्या दोन दशकांहून अधिक काळाच्या अथक परिश्रमांची, प्रामाणिकतेची आणि जनतेप्रती असलेल्या बांधिलकीची पावती मानली जात आहे. सातारा जिल्ह्यातील जेष्ठ पत्रकार विजय टाकणे यांचे बंधू आहेत.

सर्वसाधारण घरातून उभा राहिलेला आदर्श अधिकारी

राजेंद्र टाकणे यांचा प्रवास साधा पण प्रेरणादायी आहे. ग्रामीण भागातील सर्वसाधारण कुटुंबातून ते शिक्षण घेत होते तेव्हा आर्थिक व सामाजिक आव्हाने त्यांच्या वाट्याला आली. तरीही चिकाटी, जिद्द आणि अभ्यास यांच्या जोरावर त्यांनी शिक्षण पूर्ण केले. काही काळ त्यांनी शिक्षक म्हणून सेवा केली, पण लोकसेवेची ओढ त्यांना पोलीस सेवेकडे घेऊन गेली.

राज्यभरातली कामगिरी आणि शौर्यगाथा

पोलीस सेवेत दाखल झाल्यानंतर मुंबई, कोल्हापूर, पुणे, दौंड, शिरूर, पंढरपूर, सोलापूर आणि करकंभ अशा विविध ठिकाणी त्यांनी गुन्हेगारीविरोधी लढ्यात मोलाची कामगिरी केली. मोठ्या गुन्हेगारी टोळ्यांवर कारवाई असो, अवैध धंद्यांचे निर्मूलन असो किंवा संवेदनशील प्रकरणांचा निपटारा – त्यांनी नेहमी निर्भय, पारदर्शक आणि न्याय्य भूमिका घेतली.

जनतेशी संवाद आणि विश्वासाचा पूल

राजेंद्र टाकणे यांच्या कार्यपद्धतीतील एक मोठा गुण म्हणजे जनतेशी सुसंवाद साधण्याची कला. त्यांच्या मते, पोलीस आणि जनता हे एकाच नाण्याच्या दोन बाजू आहेत. डीजे-मुक्त मिरवणुका, शांततेत गणेशोत्सव व दुर्गा उत्सव, महिलांच्या सुरक्षेसाठी विशेष मोहिमा, शाळा-कॉलेजमध्ये गुन्हेगारी प्रतिबंधक व्याख्याने अशा उपक्रमांतून त्यांनी समाजातील प्रत्येक घटकाला पोलिसांशी जोडून घेतले.

सामाजिक बांधिलकीही तितकीच ठाम

 पोलीस गणवेशाच्या पलीकडे जाऊन राजेंद्र टाकणे यांनी अनेक सामाजिक उपक्रम हाती घेतले. वनक्षेत्रात पाणी व्यवस्थापन, वृक्षसंवर्धन, पर्यावरण संरक्षणासाठी लोकसहभागातून मोहिमा उभारल्या. राजकीय व सामाजिक क्षेत्रातील अनेक मान्यवरांसोबत त्यांनी समाजहिताचे प्रकल्प राबवले.

गौरव आणि सन्मान

त्यांच्या उत्कृष्ट कार्याबद्दल पोलीस महासंचालक पथकाने त्यांचा विशेष गौरव केला आहे. कर्तव्यपरायणता, पारदर्शक वागणूक आणि कायद्याप्रती असलेली निष्ठा यामुळे ते “निगर्वी व प्रमाणिक अधिकारी” म्हणून ओळखले जातात. “सदरक्षणाय व खलनिग्रहणाय” हे पोलीस सेवेतले वाक्य त्यांनी केवळ शब्दांत नव्हे तर कृतीतून सिद्ध केले आहे.

पदोन्नतीनंतर शुभेच्छांचा वर्षाव

 नांदेड येथील अप्पर पोलीस उपायुक्त पदावर बदली झाल्यानंतर सहकारी अधिकारी, नागरिक, समाजसेवक, पत्रकार, राजकीय नेते आणि मित्रपरिवाराकडून त्यांच्यावर शुभेच्छांचा वर्षाव होत आहे. म्हसवडसह संपूर्ण सातारा जिल्ह्यासाठी ही पदोन्नती अभिमानाची बाब ठरली आहे.

       राजेंद्र टाकणे यांचा हा प्रवास हे दाखवून देतो की, साध्या घरातूनही प्रामाणिकपणा, कर्तव्यदक्षता आणि चिकाटीच्या जोरावर शिखर गाठता येते. त्यांच्या या यशोगाथेने असंख्य तरुणांना प्रेरणा मिळणार आहे.