जिल्हा
Trending
दहिवडी व गोंदवले शहराला जोडणारा महत्त्वाचा रस्ता पुलाच्या कामासाठी दि.१३ जानेवारी पासून बंद ! या पर्यायी मार्गाने होणार वाहतूक…
वृत्त दि. – सोमवार,१२ जानेवारी २०२५
वृत्त – माण,सातारा.
माण तालुक्यासह सातारा जिल्ह्यात, सध्या रस्त्यांची दुरुस्ती व विस्तारीकरणाची कामे होत असताना पाहायला मिळत आहेत.यास अनुसरून दहिवडी व गोंदवले बु. या शहरांना जोडणारा महत्त्वाचा मार्ग असलेल्या दहिवडी ते गोंदवले बु. रस्त्यावरून प्रवास करणाऱ्या नागरिकांना प्रशासनाकडून महत्त्वाच्या सूचना देण्यात आल्या आहेत.
या रस्त्यावरून सार्वजनिक बांधकाम विभाग दहिवडी यांचेमार्फत पुलाच्या रस्त्याचे काँक्रिटीकरणाचे काम चालू आहे. या कामामुळे मंगळवार दि.१३ जानेवारी ते ३१ जानेवारी यादरम्यान हा रस्ता वाहतुकीसाठी पूर्णतः बंद करण्याचा निर्णय सार्वजनिक बांधकाम विभाग दहिवडी व जिल्हा पोलीस अधीक्षक सातारा यांनी घेतला आहे.
पुलावरून कॉंक्रिटीकरणाच्या कामाच्यावेळी वाहतूक कोंडी होऊ नये तसेच प्रवाशांची गैरसोय होऊ नये यासाठीदहिवडी बाजुकडुन गोंदवले बु. कडे जाणाऱ्या व येणाऱ्या वाहतुकीचे नियोजन होणे आवश्यक आहे. या अनुषंगाने पर्यायी मार्गाची उपलब्धता असल्याने सदर मार्गावरील वाहतुक वळविणे आवश्यक आहे. त्याबाबतची अधिसुचना जिल्हा पोलीस अधीक्षक तुषार दोशी यांच्यामार्फत प्रसिद्ध करण्यात आली आहे.
याविषयी अधिक माहिती अशी की, सातारा पोलीस अधीक्षक तुषार दोशी यांनी महाराष्ट्र पोलीस अधिनियम १९५१ चे कलम ३४ अन्वये प्राप्त असलेल्या अधिकारान्वये दहिवडी ते गोंदवले बु// या मार्गावरील पुलाच्या रस्त्याचे क्राँक्रेटीकरणाचे काम पुर्ण होईपर्यंत सदर मार्गावरील जाणारी व येणारी वाहतुकीत बदल करुन वाहतुक व्यवस्था सुरळीत राहणेकरीता मंगळवार दि. १३/०१/२०२६ चे ००.०१ ते सोमवार ३१/०१/२०२६ चे २३.५९ वा. पर्यंत खालीलप्रमाणे अधिसुचना पारित केली आहे.
वाहतुक मार्गातील बदलाबाबत वाहतुक मार्गातील बदल खालीलप्रमाणे करण्यात आला आहे.
१. दहिवडी बाजुकडुन गोंदवले बु// बाजुकडे जाणारी सर्व प्रकारची वाहतुक ही मायणी चौक दहिवडी येथुन खांडसरी चौक मार्गे गोंदवले बु// अशी जाईल.
२. म्हसवड, गोंदवले बु// बाजुकडुन दहिवडी कडे जाणारी वाहतुक ही गोंदवले बु// येथील आप्पा महाराज चौकातुन पंढरपुर ते सातारा मार्गाने खांडसरी चौक मार्गे दहिवडी कडे जाईल.
३. दहिवडी येथुन गोंदवले बु// या मार्गावरील सर्व प्रकारची वाहतुक पूर्णतः बंद राहील.
तरी वरील वाहतुक ज्या ठिकाणावरुन वळविण्यात आली आहे. त्या ठिकाणी पोलीस बंदोबस्त नेमण्यात आला आहे. वरील वाहतुक मार्गात केलेल्या बदलांसाठी सर्व नागरीकांनी व वाहन चालकांनी नोंद घेवून पोलीस दलास सहकार्य करावे असे विनम्र आवाहन दहिवडी पोलीस स्टेशनचे सपोनि दत्तात्रय दराडे यांनी केले आहे.