🌊 इंद्रायणीच्या पुरामुळे माऊलींच्या पालखी सोहळ्यात मोठा बदल; भाविकांना आळंदीत न येण्याचे आवाहन

वृत्त – आळंदी, पुणे.

    आळंदी, दि. ६ जुलै : महाराष्ट्रभर सुरू असलेल्या मुसळधार पावसामुळे इंद्रायणी नदीने धोकादायक पातळी ओलांडली असून, आळंदी परिसरात पूरसदृश परिस्थिती निर्माण झाली आहे. या पार्श्वभूमीवर श्री ज्ञानेश्वर महाराज संस्थान समिती, आळंदी यांनी वारकरी भाविकांसाठी महत्त्वाचे निवेदन जारी केले आहे.

     संस्थान समितीने दिलेल्या माहितीनुसार, इंद्रायणी नदीवरील पूल, घाट, वीज व्यवस्था तसेच वाहतूक व्यवस्थेवर पुराचा परिणाम झाला आहे. इंद्रायणी पुलावरील कठडे, लाईटचे खांब वाहून गेले आहेत. पिण्याच्या पाण्याची व्यवस्था करणे अशक्य आहे. तसेच पालखी प्रस्थान सोहळ्यासाठी आलेल्या भाविकांच्या दर्शन व्यवस्थेसाठी उभारलेली दर्शनबारीसुद्धा पुराच्या पाण्यात वाहून गेली आहे. सोहळ्यासाठी लावलेले बरेचसे मोबाईल टॉयलेट्सही पुरात वाहून गेले आहेत. लाईट बंद आहे. आळंदी मध्ये येणाऱ्या वारकऱ्यांची व्यवस्था करणे शक्य नाही.पालखी मार्गावरील तंबू व राहुट्यांच्या जागी चिखल झाल्याने निवाऱ्याची व्यवस्था करणे अशक्य झाले आहे.

     या परिस्थितीमुळे श्री संत ज्ञानेश्वर महाराज यांचा आषाढी वारी पालखी सोहळा, दि. ८ जुलै २०२६ रोजी दुपारी ३ वाजता श्रींच्या संजीवन समाधी मंदिरात होणारा पालखी प्रस्थान सोहळा अत्यंत मर्यादित स्वरूपात पार पडणार असल्याचा निर्णय संस्थान समितीने घेतला आहे.

     यामध्ये श्रींच्या रथापुढील दिंडी क्रमांक १ ते २७ व व रथामागील दिंडी क्रमांक १ ते २० (पोट भाग धरून एकूण ५६) यांतील प्रत्येकी १० वारकरी असे मिळून एकूण ५६० वारकरी आणि परंपरेनुसार दिंडीप्रमुख, मानकरी सेवेकरी यांना नारळ प्रसादासाठी एकूण ५०० व्यक्तींनाच प्रवेश दिला जाणार आहे. मानाचे खांदेकरी, कर्मचारी, आरोग्य, स्वच्छता व पोलीस कर्मचारी यांच्यासह सुमारे १,६६० व्यक्तींमध्ये पालखी प्रस्थान सोहळा पार पाडण्यात येईल.

    संस्थान समितीने सर्व वारकरी भाविकांना आवाहन केले आहे की, पालखी प्रस्थान सोहळ्यासाठी आळंदीस न येता पाऊस,पूरस्थिती आणि नैसर्गिक वातावरण लक्षात घेता पुढील मुक्कामी सोहळ्यात सहभागी व्हावे, असे आवाहन करण्यात आले आहे.

– श्री ज्ञानेश्वर महाराज संस्थान समिती, आळंदी