खा.शरदचंद पवार यांचा वाढदिवस दहिवडीत विविध सामाजिक उपक्रमांनी साजरा ! उत्स्फूर्त प्रतिसादात झाले रक्तदान शिबिर…

वृत्त – दहिवडी,ता.माण,जि.सातारा.

वृत्त दि – शुक्रवार, दि.१२ डिसेंबर २०२५

       रयत शिक्षण संस्थेचे अध्यक्ष खा.पद्मभूषण शरदचंद्र पवार यांचा यांचा ८५ वा वाढदिवस दहिवडी कॉलेज दहिवडी येथे राष्ट्रीय सेवा योजना,राष्ट्रीय छात्र सेना, जिमखाना विभाग व संकल्प ब्लड बँक सातारा यांच्या संयुक्त विद्यमाने रक्तदान शिबिर व इतर समाज विधायक उपक्रम राबवून साजरा करण्यात आला. रक्तदान शिबिराचे उद्घाटन महाविद्यालय विकास समितीचे चेअरमन प्रभाकर देशमुख, रयत शिक्षण संस्थेचे सचिव विकास देशमुख यांच्या हस्ते करण्यात आले.

      कार्यक्रमासाठी महाविद्यालय विकास समिती सदस्य अजित पवार, सुनील जाधव,नंदकुमार खोत,सुरेंद्र मोरे,उपप्राचार्य विष्णू मस्के आदी मान्यवर उपस्थित होते. या वाढदिवसाचे औचित्य साधून रयत स्पर्धा परीक्षा ॲकॅडमी उद्घाटन,पोस्टर प्रेझेंटेशन स्पर्धा ,पी एम उषा ऑनलाइन पोर्टलचे उद्घाटन मान्यवरांच्या हस्ते करण्यात आले.

     प्रभाकर देशमुख उद्घाटन प्रसंगी म्हणाले, आदरणीय शरदचंद्रजी पवार यांनी संपूर्ण आयुष्यभर राजकारणापेक्षा समाजकारणाला जास्त महत्त्व दिले म्हणूनच इतर अनेक लोकांपेक्षा साहेबांचे वेगळेपण महत्त्वाचे आहे. त्यांनी संपूर्ण आयुष्यभर सर्वसामान्य लोकांना केंद्रबिंदू मानून शेतकरी आणि गरीब जनता हा आपल्या समाजकारणाचा केंद्रबिंदू मानला. म्हणूनच देशाच्या राजकीय पटलावरती सर्वात जास्त दिवस सन्मानाने अनेक विशेषण आणि पुरस्काराने त्यांना सन्मानित करण्यात आले. जीवन जगत असताना शेवटच्या श्वासापर्यंत आणि अंगी असणाऱ्या आत्मविश्वासाच्या जोरावर सर्व संकटावर मात करत सामान्य लोकांचा सर्वमान्य नेता म्हणून आपली ओळख प्राप्त करता आली. श्री पवार यांना दीर्घायुष्य लाभो अशा शुभेच्छा देऊन आपल्या मनोगताची श्री देशमुख यांनी आपल्या सांगता केली.

“रक्तदान हेच सर्वश्रेष्ठ दान” ही युक्ती सार्थ ठरवत आपल्यामुळे अनेकांना जीवनदान मिळावे या उद्देशाने,शिबिरामध्ये एकूण ८६ रक्तदात्यांनी रक्तदान केले. विकास देशमुख व प्रभाकर देशमुख यांच्या हस्ते केक कापून खा.शरद पवार यांना दीर्घायुष्य लाभण्याच्या शुभेच्छा देण्यात आल्या.

      यावेळी विकास देशमुख म्हणाले, दहिवडी कॉलेज दहिवडी हे अनेक सामाजिक तसेच शैक्षणिक उपक्रम राबवित असून रयत शिक्षण संस्थेच्या सर्वच महाविद्यालयात गुणवत्तेच्या स्पर्धेत, स्वतःचे मानांकन टिकून असून येथे सर्व गुणसंपन्न विद्यार्थी घडविण्यासाठी प्रभाकर देशमुख यांच्या मार्गदर्शनाखाली माणदेशी पट्ट्यातील अनेक विद्यार्थ्यांना गुणवत्ता आणि लौकिकास पात्र शिक्षण देत आहे. स्पर्धा परीक्षा केंद्राच्या माध्यमातून अनेक अधिकारी घडविण्याचा मानस या महाविद्यालयाचा असून याचा आम्हाला सार्थ अभिमान आहे. यावेळी स्पर्धा परीक्षेतील यशस्वी विद्यार्थ्यांचा मान्यवरांचे हस्ते सन्मान करण्यात आला. भविष्यकाळातही या महाविद्यालयाने एक वेगळी उंची गाठण्यासाठी तुम्ही सर्व रयतसेवकांनी प्रयत्न करावेत, त्यासाठी संस्था प्रशासन तुमच्या सर्वांच्या पाठीशी भक्कमपणे उभे आहोत. येथे असणाऱ्या सर्व विद्यार्थ्यांनी महाविद्यालयाने दिलेल्या सर्व सोयी सुविधांचा लाभ घ्यावा, असे आवाहन करण्यात आले.विकास देशमुख यांचाही वाढदिवस याच दिवशी असल्याने त्यांचाही वाढदिवस केक कापून तसेच शुभेच्छा देऊन साजरा करण्यात आला.

    या कार्यक्रमाचे प्रस्ताविक डॉ.प्राचार्य संजय खेत्रे यांनी केले. सूत्रसंचालन प्रा.इंद्रजीत ऐवळे यांनी तर आभार प्रदर्शन डॉ.बी.डी.जाधव यांनी केले. रक्तदान शिबिर व इतर उपक्रम यशस्वी करण्यासाठी डाॕ.शिवशंकर लेकुरवाळे, प्रा.वैशाली खाडे आदीसह सर्व प्राध्यापक व शिक्षकेतर सेवकांनी परिश्रम घेतले.