सपोनि दत्तात्रय दराडे यांची जिल्ह्यात सर्वोत्कृष्ट कामगिरी ! तब्बल ९५ गुन्ह्यांची केली निर्गती; पोलीस अधीक्षक तुषार दोशी यांचेकडून प्रशंसापत्र…

वृत्त – माण, सातारा.

वृत्त दि.- १७ नोव्हेंबर २०२५

      दहिवडी पोलीस स्टेशनला सपोनि अक्षय सोनवणे यांच्या नेतृत्वात गतवर्षी जिल्ह्यातील सर्वोत्कृष्ट पोलीस स्टेशन पुरस्कार मिळाला आहे. त्यानंतर काही कालावधीमध्येच सपोनि अक्षय सोनवणे यांची म्हसवड पोलीस स्टेशन येथे बदली झाली. त्यानंतर दहिवडी पोलीस स्टेशनचा कार्यभार सपोनि दत्तात्रय दराडे यांनी स्वीकारला.सोपोनि दत्तात्रय दराडे यांनी दहिवडी पोलीस स्टेशन चा कार्यभार स्वीकारल्यावर त्यांच्यासमोर अनेक क्लिष्ट प्रसंगातील गुन्ह्यांचा तपास करण्याचे आव्हान उभे राहिले. परंतु पोलीस खात्यातील आपल्या दांडग्या अनुभवाच्या जोरावर त्यांनी अनेक क्लिष्ट गुन्ह्यांचा तपास करून गुन्हे उघडकीस आणले. पोलीस प्रशासन आणि न्यायपालिका या एकाच नाण्याच्या दोन बाजू असल्याने, न्यायदानाच्या प्रक्रियेत अनेक गुन्ह्यांमध्ये आपला मोलाचा वाटा उचलला. त्यामुळे राज्यासह जिल्ह्यात दहिवडी पोलीस स्टेशनचा नावलौकिक वाढला आहे.

     सपोनि दत्तात्रय दराडे यांच्या याच धडाकेबाज कामाची दखल घेत; जिल्हा पोलीस अधीक्षक तुषार जोशी यांनी सोमवार, दि. १७ नोव्हेंबर रोजी दहिवडी पोलीस स्टेशनचे सपोनि दत्तात्रय दराडे यांना जिल्ह्यातील सर्वोत्कृष्ट कामगिरी केल्याबद्दल प्रशंसापत्र देत हार्दिक अभिनंदन केले व शुभेच्छा दिल्या आहेत.

     याबाबत अधिक माहिती अशी की,दहिवडी पोलीस ठाणेस प्रलंबित असलेल्या गुन्हयांचा आढावा घेवून त्या अनुषंगाने पोलीस ठाणे स्तरावर माहे ऑक्टोंबर २०२५ मध्ये विशेष गुन्हे निर्गती मोहिम राबविण्यात आलेली होती. त्यामध्ये दहिवडी पोलीस ठाणे कडील IPC/BNS अन्वये दाखल गुन्हयांपैकी एकुण ३५ गुन्हे, SLL अन्वये ०७ गुन्हे व दारुबंदी कायद्यान्वये दाखल एकुण ४९ गुन्हे व अकस्मात मयत प्रकरणे एकुण ०४ प्रकरणांची निर्गती केली आहे. आपण वैयक्तिक लक्ष पुरवून माहे ऑक्टोंबर महिन्यामध्ये एकुण ९५ गुन्हे / प्रकरणांची निर्गती केलेली आहे.

   आपण प्रलंबित गुन्हयांचे / अकस्मात मयत प्रकरणांचे निर्गतीकरीता विशेष गुन्हे निर्गती मोहिम राबवून तपासी अधिकारी व अंमलदार यांना मार्गदर्शन करुन, गुन्हे निर्गतीकरीता पाठपुरावा करून, विशेष प्रयत्न केल्यामुळे पोलीस ठाणेस प्रलंबित गुन्हयांची / अकस्मात मयत प्रकरणांची समाधानकारक निर्गती झालेली असून गुन्हे प्रलंबित राहण्याचे प्रमाण हे कमी झालेले आहे.

       आपण केलेल्या प्रशंसनीय व सर्वोत्कृष्ट कामगिरीबाबत आपले “हार्दिक अभिनंदन” करण्यात येत आहे. आपल्या या उल्लेखनीय कामगिरीचा जिल्हा पोलीस दलास अभिमान वाटतो. आपण यापुढील काळातही कर्तव्यतत्पर राहून जिल्हा पोलीस दलाची क्षमता व परिणामकारकता वाढविण्यास प्रयत्नशील राहाल असा आम्हास दृढ विश्वास आहे. अशा आशयाचे प्रशंसापत्र जिल्हा पोलीस अधीक्षक तुषार दोशी यांनी श्री दराडे यांना दिले आहे.

     यावेळी श्री दोशी म्हणाले, दहिवडी पोलिसांचे हे कार्य संपूर्ण जिल्ह्यासाठी प्रेरणादायी आहे.गुन्हेगारांना पकडण्यासाठी त्यांनी दाखवलेली तत्परता व कार्यकर्तव्यनिष्ठा ही आदर्शवत आहे.भविष्यात ही अशीच कामगिरी अपेक्षित आहे.

     सपोनि दत्तात्रय दराडे व दहिवडी पोलिस स्टेशनच्या सर्व स्टाफने केलेल्या या विशेष उल्लेखनीय कामगिरीबद्दल दहिवडी व पंचक्रोशी सह जिल्ह्यातून दहिवडी पोलिसांचे अभिनंदन होत आहे,नागरिक कौतुक करत आहेत.