बालविकास व पोषणाचा दहिवडीत जागर ! आरंभ पालक मेळावा मोठ्या उत्साहात साजरा…

वृत्त – गुरुवार,दि.२१फेब्रुवारी २०२५

वृत्त – दहिवडी,ता.माण,जि.सातारा.

       बालविकास आणि पोषणाचे महत्त्व समाजात पोहोचवण्यासाठी तसेच याबाबत जनमानसात जागरूकता निर्माण करण्याच्या उद्देशाने, महाराष्ट्र शासन बाल विकास प्रकल्प अधिकारी नागरी सातारा पूर्व प्रकल्प यांच्याकडून सातारा जिल्ह्यातील माण तालुक्यातील दहिवडी बीटमार्फत गुरुवार दिनांक २० फेब्रुवारी रोजी दहिवडी नगरीचे ग्रामदैवत श्री सिद्धनाथ मंदिर व परिसरामध्ये सकाळी १० ते सायंकाळी ५ या दरम्यान आरंभ पालक मेळाव्याचे आयोजन करण्यात आले होते. या मेळाव्याला दहिवडी व दहिवडी पंचक्रोशीतून बालचमूंसह पालकवर्गातून तसेच सुजान नागरिकांकडून भरभरून प्रतिसाद मिळाला व लोकजागृतीसाठी असे मेळावे वारंवार आयोजित करण्यात यावेत अशा प्रतिक्रिया उपस्थितांनी दिल्या.

        या कार्यक्रमास विशेष उपस्थिती म्हणून नवनिर्वाचित भारतीय प्रशासकीय अधिकारी ओंकार गुंडगे,सातारा जिल्हापरिषदेचे माजी शिक्षण व अर्थ सभापती ॲड.भास्करराव गुंडगे काका यांच्यासोबत डॉ.वसुधा कर्णे यांनी दर्शवली.

        या कार्यक्रमाचे प्रमुख उपस्थिती म्हणून माण – खटाव तालुक्याच्या उपविभागीय अधिकारी उज्वला गाडेकर,नायब तहसीलदार योगिता ढाले, दहिवडी नगरपंचायत चे मुख्याधिकारी संदीप घार्गे, माजी नगराध्यक्षा साधना गुंडगे,उपनगराध्यक्ष राजेंद्र साळुंखे,महिला बालकल्याण सभापती मोनिका गुंडगे, नगरसेविका उज्वला पवार,वर्षा सावंत यांच्यासोबत रुपेश कदम,चैतन्य काशिद,अजित कुंभार,उमेश बुधावले, नवनाथ भिसे,प्रवीण राजे आदी पत्रकार बांधव उपस्थित होते.

      यावेळी नागरी सातारा पूर्व प्रकल्प पर्यवेक्षिका हेमलता मोरे,माण – खटाव उपविभागीय अधिकारी उज्वला गाडेकर, डॉ.वसुधा कर्णे,दहिवडी नगरपंचायतचे मुख्याधिकारी संदीप घार्गे,भारतीय प्रशासकीय सेवा अधिकारी ओंकार गुंडगे आदी मान्यवरांनी आपली मनोगते मांडली.

      या आरंभ पालक मेळाव्या मधून बालविकासाचे महत्त्व समाजात पोहोचवण्याचा व त्याद्वारे या संबंधात जागरूकता निर्माण करून पालकांना बालसंगोपनाच्या विविध घटकांबाबत माहिती दिली गेली.

        या मेळाव्यामधून पालकांना बालसंगोपनाच्या विविध घटकांबाबत माहिती मिळाली,पालक आणि बालसंगोपनाच्या सेवकांमध्ये चर्चा झाली,पालकांना त्यांच्या मुलांसह घरी चांगले संवाद करण्यास प्रोत्साहित करण्यात आले,बालसंगोपनात त्यांना येणाऱ्या अडचणींवर चर्चा झाली,समुदायातील प्रत्येक घटकांपर्यंत बालविकासाचे महत्त्व आणि संदेश पोहोचवण्याचा प्रयत्न केला गेला. तसेच या आरंभ पालक मेळाव्यात गरोदर माता,स्तनदा माता व १ ते ३ वर्षाच्या बालकांना द्यावयाचा सकस आहाराबाबत मार्गदर्शन करण्यात आले.

        हा पालक आरंभ मेळावा म्हणजे बालविकासाचे महत्त्व आणि संदेश समाजात पोहोचवण्यासाठी प्रभावी माध्यम म्हणून काम करते.अशी माहिती नागरी सातारा पूर्व प्रकल्प पर्यवेक्षिका हेमलता मोरे यांनी दिली आहे तसेच सर्व अंगणवाडी सेविका व मदतनीस दहिवडी यांनी दिली.

       हा आरंभ पालक मेळावा यशस्वी करण्यासाठी बाल विकास प्रकल्प अधिकारी नागरी सातारा पूर्व ज्योती लंगोटे यांचे विशेष मार्गदर्शन लाभले. या कार्यक्रमाचे सूत्रसंचालन अंगणवाडी सेविका वैशाली पवार यांनी केले तर आभार प्रदर्शन पर्यवेक्षिका हेमलता मोरे यांनी केले.

       या आरंभ पालक मेळाव्यास परिसरातील अनेक शाळांचे विद्यार्थी विद्यार्थिनी यांच्या समवेत शाळेचे मुख्याध्यापक,शिक्षक,आशा वर्कर, ए.एन.एम आणि पोलीस कर्मचारी यांना आवर्जून भेट दिली तसेच मेळाव्यास सातशेहून अधिक पालकांनी भेट दिली व हा उपक्रम अतिशय उत्तम कार्यक्रम असल्याचे अभिप्राय दिला.या पालक मेळाव्यामुळे परिसरामध्ये उत्साहवर्धक, आनंददायी वातावरण निर्माण झाले होते.