श्री स्वामी समर्थ प्रकट दिनानिमित्त; सोमवार दि.३१ मार्च रोजी दहिवडीत विविध कार्यक्रमांचे आयोजन…

वृत्त दि.- २९ मार्च २०२५

वृत्त – दहिवडी,ता.माण,जि.सातारा

       उधळा गुलाल, वाजवारे नगारे
त्रैलोक्य चे स्वामी आज धर्तीवर आले.
अनुसूयेचा तूच दत्त, सुमतीचा तूच श्रीपाद अंबा भवानीचा तूच नरहरी, आम्हां कैवाऱ्याचा तूच स्वामी.
“अशक्य हि सारे करितो शक्य” एक क्षणात “भिऊ नकोस मी पाठीशी आहे” असे सदा सांगे आम्हास.”

     अशा भावना  महाराष्ट्रासह देशातील सर्व श्री स्वामी समर्थ भक्तांमध्ये आहेत. याचे कारण म्हणजे सोमवार दि.३१ मार्च रोजी साजरा होत असलेला “श्री स्वामी समर्थ महाराजांचा प्रकट दिन सोहळा”. सातारा जिल्ह्यासह महाराष्ट्रात हा प्रकट दिन सोहळा मोठ्या उत्साहात व आनंदात आणि भक्तीमय वातावरणात साजरा केला जातो.

      या पार्श्वभूमीला अनुसरून सातारा जिल्ह्यातील माण तालुक्यात दहिवडी, वडूज,म्हसवड, बिदाल,गोंदवले यांसह अनेक गावांमध्ये श्री स्वामी समर्थ प्रकट दिन सोहळा विविध धार्मिक तसेच सामाजिक कार्यक्रमांचे आयोजन करून मोठ्या उत्साहात साजरा केला जातो.

        चालू वर्षी श्री स्वामी समर्थ प्रकट दिनानिमित्त सोमवार दि.३१ रोजी दहिवडी येथील श्री स्वामी समर्थ मंदिरामध्ये विविध धार्मिक कार्यक्रमांचे आयोजन करण्यात आले आहे. यामध्ये सकाळी ७ वा.श्रींचा अभिषेक व पूजा, सकाळी ८-३० वा. सर्व महिला व पुरुष सेवेकरी यांच्या उपस्थितीत पालखी मिरवणूक व ग्राम प्रदक्षिणा, सकाळी १०-३० वा. श्री स्वामी चरित्र सारामृत पठण, सकाळी ११-३० वा. भजन व नामस्मरण,सकाळी १२-३० वा. श्रींची आरती, दुपारी १ ते ३ वा. महाप्रसाद ( यावर्षी या महाप्रसादानिमित्त अन्नदान करण्याचा मान प्रा. श्रीशैल्य स्वामी सर यांना लाभलेला आहे ), दुपारी ३ ते सायंकाळी ६ वाजेपर्यंत सामुदायिक उपासना,भजन, गायन आणि सायंकाळी ७ वाजता संध्याकाळच्या आरतीने या एकदिवशीय कार्यक्रमाचा समारोप होणार आहे.

     या कार्यक्रमासाठी दहिवडीसह दहिवडी पंचक्रोशीतील सर्व स्वामी भक्तांनी, महिला पुरुष मंडळींनी आवर्जून उपस्थित राहून या कार्यक्रमाचा येथेच्छ लाभ घ्यावा अशी नम्र विनंती श्री स्वामी समर्थ सेवा मंडळ दहिवडी यांनी केली आहे.