ग्रामविकास मंत्री जयकुमार गोरे यांनी सपत्नीक घेतले अक्कलकोट श्री स्वामी समर्थांचे दर्शन !

वृत्त दि.- बुधवार, दि.२ एप्रिल २०२५

वृत्त – अक्कलकोट, महाराष्ट्र.

      ग्रामविकास आणि पंचायतराज मंत्री तथा सोलापूर जिल्ह्याचे पालकमंत्री ना. जयकुमार गोरे (भाऊ) हे बुधवार दि. २ एप्रिल रोजी अक्कलकोट दौऱ्यावर आले असता त्यांनी अक्कलकोट येथील श्री वटवृक्ष स्वामी महाराज मंदिरास सपत्नीक भेट देऊन श्री स्वामी समर्थांचे दर्शन घेतले. श्रींचा आशीर्वाद घेऊन सर्व जनतेच्या सुख-समृद्धी आणि आरोग्यदायी जीवनासाठी प्रार्थना केली. याप्रसंगी मंदिर समितीतर्फे पालकमंत्री जयकुमार गोरे व त्यांच्या पत्नी सोनिया गोरे यांना श्री स्वामी समर्थांचे कृपावस्त्र, प्रसाद, प्रतिमा देवून यथोचित सत्कार केला.

     याप्रसंगी श्री गोरे हे आपल्या भावना व्यक्त करताना म्हणाले, “धर्म,संस्कृती आणि परंपरा जपण्यात वटवृक्ष देवस्थान राज्यात अग्रेसर आहे.” पालकमंत्री म्हणून लोकसेवा करण्यासाठी श्री स्वामी समर्थांच्या आशीर्वाद घेण्यासाठी आलेलो आहे. “भिऊ नकोस मी तुझ्या पाठीशी आहे”, हा श्री स्वामी समर्थांचा कानमंत्र आपल्या सर्वांना ऊर्जा देऊन सदैव प्रेरणेचा स्त्रोत म्हणून साथ देतो.

     श्री स्वामी समर्थांचे दर्शन घेतल्यानंतर जाता जाता त्यांनी मंदिर परिसराची पाहणी करून मंदिरात होत असलेली विविध विकासाभिमुख कामे पाहून व मंदिर समितीचे उपक्रम जाणून घेऊन समाधान व्यक्त केले.

श्री स्वामी समर्थ अन्नछत्र मंडळास भेट देऊन संस्थेच्या सामाजिक कार्याचा गौरव केला. हे अन्नछत्र मंडळ श्रद्धा,संस्कार आणि समाजसेवेचा दीपस्तंभ आहे, असे म्हणत तालुक्यातील ७७ कुस्तीगीरांसाठी देण्यात येणाऱ्या पोषणखुराक योजनेसह दिव्यांग आणि निराधारंसाठी सुरू केलेल्या महाप्रसाद सेवेचे विशेष कौतुक केले.

     यावेळी अक्कलकोटचे आमदार सचिन दादा कल्याण शेट्टी,महेश हिंडोळे,अमोलबापू पवार, आनंदराव तानवडे आणि अन्य मान्यवर उपस्थित होते.