माण तालुक्यासाठी मोठी बातमी ! अतिवृष्टीमुळे दहिवडी पोलिसांकडून या ठिकाणी वाहतूक बदल व रस्ता बंद…

वृत्त दि – रविवार, २५ मे २०२५

वृत्त – माण, सातारा.

     जिल्ह्यासह महाराष्ट्रात गेली आठवडाभरापासून पावसाचा जोर मोठ्या प्रमाणात आहे. ठिकठिकाणी पूरसदृश्य परिस्थिती निर्माण झाली आहे. त्यामुळे नागरिकांची सुरक्षितता तसेच दुर्घटना टाळण्यासाठी प्रशासनाकडून योग्य ती खबरदारी घेतली जात आहे.

    या पार्श्वभूमीला अनुसरून, सातारा जिल्ह्यातील,माण तालुका व परिसरामध्ये मागील चार-पाच दिवसापासून संततधार पाऊस सुरू असल्याने परिसरातील नदी,ओढे,नाले तुडुंब भरून वाहत आहेत. परिसरातील अनेक पुल पाण्याखाली गेले असल्याने नागरिकांनी पर्यायी रस्त्याचा वापर करावा,नदी व ओढ्यावरील पुलावरून पाणी कमी झाल्याशिवाय कोणीही पायी,दुचाकी किंवा चार चाकी अशा प्रकारचे कोणते वाहन नेऊ नये व पुराच्या पाण्यात जाऊ नये,असे आवाहन दहिवडी पोलीस स्टेशनच्या वतीने सपोनि दत्तात्रय दराडे यांनी केले आहे.

      तसेच खबरदारी म्हणून दहिवडी पोलिसांनी पुढीलप्रमाणे काही रस्ते बंद केले आहेत तर काहींना पर्यायी मार्ग निर्माण केले आहेत

१) दहिवडी – मार्डी रोड बंद करण्यात आला आहे.

२) मलवडीहून आंधळीकडे जाणारा रस्ता बंद करण्यात आला आहे.

३) मौजे बिजवडी येथे बॅरिकेट लावून रस्ता पूर्णपणे वाहतुकीस बंद करण्यात आला आहे.

४) दहिवडी – पिंगळी रोड बंद करण्यात आला असून पर्यायी मार्ग म्हणून मायणी रोड चा वापर करावा.

५)आप्पा महाराज चौक गोंदवले येथून दहिवडी कडे येणारी सर्व वाहतूक खंडसरी चौक मार्गे वळवण्यात आलेली आहे आणि सदरचा रस्ता बॅरिकेट लावून बंद करण्यात आला आहे.

६) याखेरीज मलवडी ते कुळकजाई रस्ता यापूर्वीच खचल्याने याही रस्त्यावरील वाहतूक बंद करण्यात आली आहे.

        याशिवाय श्री दराडे यांनी माणवासियांना असे आवाहन केले आहे की,जास्त पाण्याच्या ठिकाणी जनावरे, मनुष्य अडकून पडले असतिल किंवा काहीही अडचण असल्याबाबत काही माहिती मिळाली किंवा इतर कोणत्याही प्रकारची मदत लागल्यास दहिवडी पोलीस स्टेशन दहिवडी यांना 02165 -220233 या फोन नंबरवर फोन करून तात्काळ संपर्क करावा. दहिवडी पोलीस स्टेशन यांच्याकडून शक्य तेवढी जास्तीत जास्त मदत करण्यात येईल अशी ग्वाही श्री दराडे यांनी दिली आहे.

       उपरोक्त सर्व बाबींची नागरिकांनी नोंद घ्यावी आणि पोलीस प्रशासनास सहकार्य करून पर्यायी रस्त्यांचा वापर करावा,असे विनम्र आवाहन दहिवडी पोलीस स्टेशन दहिवडी यांनी सर्व माणवासियांना करण्यात आले आहे.