१५० गावांमध्ये शेतकऱ्यांशी होणार थेट संवाद ! कृषी विज्ञान केंद्र कालवडे यांच्याकडून विकसित कृषी संकल्प अभियानास प्रारंभ….

वृत्त दि.- गुरुवार, २९ मे २०२५

वृत्त – कराड, सातारा.

    भारतीय कृषि अनुसंधान परिषद, नवी दिल्ली, कल्याणी गोरक्षण ट्रस्ट, कृषि विषज्ञान केंद्र, कालवडे, ता. कराड, जि. सातारा तसेच महाराष्ट्र शासन कृषी विभाग, महात्मा फुले कृषी विद्यापीठ राहुरी व महाराष्ट्र पशु व मत्स्य विज्ञान विद्यापीठ, नागपूर, कृषी तंत्रज्ञान व्यस्थापन यंत्रणा, सातारा यांच्या संयुक्त विद्यमाने विकसित कृषि संकल्प अभियान 29 मे ते 12 जून 2025 चा प्रारंभ कराड तालुक्यातील रेठेरे खुर्द या गावामध्ये गुरुवार दि. 29 मे रोजी गावचे प्रथम नागरिक म्हणून सरपंच यांच्या हस्ते झाला.

       या अभियान अंतर्गत शेतकरी बांधवांबरोबर थेट संवाद कार्यक्रम, कृषि क्षेत्राचे नवीन तंत्रज्ञान, शासकीय योजनांची माहिती, शेतकऱ्यांच्या प्रतिक्रिया व नवीन प्रयोगांची माहिती संकलनाचा कार्यक्रम प्रत्येक गावामध्ये राबवला जाणार आहे.

     कृषी विज्ञान केंद्र कालवडे मार्फत पुढील  आगामी 15 दिवसामध्ये कराड, पाटण,कोरेगाव,खटाव व माण तालुक्यातील सुमारे 150 गावामध्ये माहिती रथ जाणार आहे. यामध्ये भारतीय कृषी अनुसंधान परिषद चे शास्त्रज्ञ डॉ. संतोष राठोड, डॉ.गोपाळकृष्ण,शासकीय पशू वैद्यकीय महाविद्यालय शिरवळचे प्राध्यापक डॉ.विकास कारंडे, कृषी संशोधन केंद्र, कराड चे शास्त्रज्ञ डॉ. चंद्रकांत कांबळे तसेच कृषी विज्ञान केंद्राचे शास्त्रज्ञ डॉ.भरत खांडेकर, डॉ.निलेश थोरात, विषय विशेषज्ञ विशाल महाजन, डॉ.दिलीप घोंगडे,तसेच मंडळ कृषि अधिकारी अभिजित पाटील,तंत्रज्ञान साहाय्यक पवन जोशी,शुभप्रधा मोहिते, आत्मा विभाग, कराड च्या तंत्रज्ञान व्यवस्थापक पूनम जाधव आदी मान्यवर उपस्थित होते.

       सर्व उपस्थित अधिकारी यांनी शासकीय योजनांची व कृषि तंत्रज्ञान याची माहिती उपस्थित सर्व शेतकरी बांधवांना दिली.अशा कार्यक्रमामध्ये शेतकऱ्यांसोबत सर्व नागरिकांनी उत्स्फूर्तपणे सहभाग नोंदवावा असे आवाहन कल्याणी गोरक्षण ट्रस्ट, कालवडे चे विश्वस्त श्री. गौरीशंकर कल्याणी व सौ. रोहिणी कल्याणी यांनी केले.