जिल्ह्यात एक नंबर दहिवडी पोलीस स्टेशन दहिवडी ! चोरीच्या गुन्ह्यांत चोरट्यांकडून १०० % मुद्देमाल हस्तगत … सपोनि दत्तात्रय दराडे व स्टाफ चा पुरस्कार देऊन सन्मान !

वृत्त दि. – बुधवार,१८ जून २०२५

वृत्त – सातारा.

    सातारा जिल्ह्यातील; माण तालुक्यातील, दहिवडी पोलीस स्टेशनला सपोनि अक्षय सोनवणे यांच्या नेतृत्वात गतवर्षी जिल्ह्यातील सर्वोत्कृष्ट पोलीस स्टेशन चा पुरस्कार मिळाला आहे. त्यानंतर काही कालावधीमध्येच सपोनि अक्षय सोनवणे यांची म्हसवड पोलीस स्टेशन येथे बदली झाली. त्यानंतर दहिवडी पोलीस स्टेशनचा कार्यभार सपोनि दत्तात्रय दराडे यांनी स्वीकारला.सोपोनि दत्तात्रय दराडे यांनी दहिवडी पोलीस स्टेशन चा कार्यभार स्वीकारल्यावर त्यांच्यासमोर अनेक क्लिष्ट प्रसंगातील गुन्ह्यांचा तपास करण्याचे आव्हान उभे राहिले. परंतु पोलीस खात्यातील आपल्या दांडग्या अनुभवाच्या जोरावर त्यांनी अनेक क्लिष्ट गुन्ह्यांचा तपास करून गुन्हे उघडकीस आणले. पोलीस प्रशासन आणि न्यायपालिका या एकाच नाण्याच्या दोन बाजू असल्याने, न्यायदानाच्या प्रक्रियेत अनेक गुन्ह्यांमध्ये आपला मोलाचा वाटा उचलला. त्यामुळे राज्यासह जिल्ह्यात दहिवडी पोलीस स्टेशन चा नावलौकिक वाढला आहे.

    सपोनि दत्तात्रय दराडे यांच्या याच धडाकेबाज कामाची दखल घेत; सातारा जिल्हा पोलीस अधीक्षक तुषार दोशी व अप्पर पोलीस अधीक्षक वैशाली कडूकर यांच्या हस्ते,श्री दराडे व दहिवडी पोलीस स्टाफचे अभिनंदन करत दहिवडी पोलीस ठाण्याला “सर्वोत्कृष्ट चोरीस गेलेली मालमत्ता हस्तगत पुरस्कार” प्रदान करण्यात आला आहे.

   ‌याबाबत अधिक माहिती अशी की, श्री दराडे यांच्या मार्गदर्शनाखाली दहिवडी पोलीस स्टेशन च्या स्टाफ ने मागील काही दिवसांपासून दहिवडी पोलीस स्टेशन हद्दीमध्ये घडलेल्या चोरीच्या गुन्ह्यांसंदर्भात एकूण सहा व एक गुन्हा नोंद न होता मानवधर्माचे पालन केले असे एकूण ७ गुन्ह्यांचा यशस्वीपणे तपास करून ते गुन्हे उघडकीस आणून आरोपींस पॉलिसी खाक्या काय असतो याची पुरेपूर जाणीव करून दिली . दहिवडी पोलिसांच्या या कर्तव्यपरायणतेचे कौतुक दहिवडीसह माण तालुक्यात होत होते.

        या पाच गुन्ह्यांपैकी एक गुन्हा माण तालुक्यातील मलवडी येथे घर दुरुस्तीच्या कामासाठी पाठवलेल्या कामगाराने लंपास केलेल्या दीड लाख रुपयांसह कामगाराला तात्काळ अटक केली आणि त्याच्याकडून चोरलेली रोख रक्कम हस्तगत करून जप्त करण्याची कामगिरी दहिवडी पोलीसांनी केली आहे.

     दुसरा चोरीचा गुन्हा दहिवडी येथील, किराणा दुकानदार चैतन्य गुंडगे यांच्या दुकानाचे शटर उचकटून दुकानातील गल्ला व रोख रक्कम चोरणाऱ्या दोन सराईत चोरट्यांना चोवीस तासांत अटक करून त्यांच्याकडून चोरीस गेलेल्या रकमेतील २२ हजार ५०० रुपये हस्तगत करण्याची उल्लेखनीय कामगिरी दहिवडी पोलिसांनी केली.या कामगिरी संदर्भात, या चोरीचा छडा अत्यल्प कालावधीत लावणाऱ्या सहाय्यक पोलीस निरीक्षक दत्तात्रय दराडे व त्यांच्या सहकाऱ्यांचा दहिवडी व्यापारी संघटनेच्या वतीने सन्मान चिन्ह देऊन गौरव करण्यात आला.

    याखेरीज तिसरा गुन्हा हा दहिवडी शहरातील एसटी स्टँड परिसरातील वडापावच्या गाड्याच्या गल्ल्यातील साडेसहा हजार रुपये चोरणाऱ्या दोन महिलांना दहिवडी पोलिसांनी पकडले.चौथा चोरीचा गुन्हा हा आंधळी ता.माण येथे झालेल्या घरफोडीचा छडा लावत दहिवडी पोलिसांनी संशयीतांना मुद्देमालासह जेरबंद केले. आंधळी येथे घडलेली घटनेत त्याच वस्तीवरील चोरटा असल्याचे पोलीस तपासात समोर आले. १ लाख ६८ हजार किमतीचा एकूण मुद्देमाल १०० टक्के हस्तगत करण्यात दहिवडी पोलिसांना यश आले.

      पाचवी चोरीची घटना दहिवडी गोंदवले रोडवर; स्वाती मंगल कार्यालयाजवळ असलेल्य किराणा मालाच्या गोदामातून रोख रक्कम व मालाची चोरी करणाऱ्या चोरट्यास दहिवडी पोलिसांनी जेरबंद केले, तसेच त्याच्याकडून चोरलेली रक्कम हस्तगत करण्यात आली.

     या एकूण पाच गुन्ह्यांमध्ये ३ लाख २८ हजार ८४० रुपयांचे चोरीच्या गुन्ह्यांमध्ये दहिवडी पोलिसांनी एकूण २ लाख ९१ हजार ३४० रुपयांचा मुद्देमाल हस्तगत करत दहिवडी पोलीस स्टेशनची मान जिल्ह्यात उंचावली आहे.

     सहावी चोरीची घटना ही दहिवडी येथील एका सद्गृहस्थाची मोटर सायकल दहिवडी शहरातील छत्रपती शिवाजी महाराज चौकातून चोरीला गेली होती. तक्रार दाखल झाल्यानंतर आठ तासांच्या आत मोटरसायकल चोरट्यांना अटक करून मोटरसायकल हस्तगत करण्याची कामगिरी दहिवडी पोलिसांनी केली.

       याशिवाय एक घटना अशी आहे की, दहिवडी पोलीसांकडून मानव धर्माचे पालन करत केवळ एका विनंती अर्जावरती एका गंभीर घटनेचा छडा लावला. दहिवडी पोलीस स्टेशन हद्दीत रहिवासी असलेल्या एका ग्रामस्थाचे त्यांनी लाँड्री मध्ये टाकलेल्या कपड्यामध्ये १३ तोळे सोने गेले होते परंतु लाँड्रीवाला इसम कबूल करत न्हवता. या सदर इसमास पोलीस स्टेशन येथे बोलावून घेवून योग्य चौकशी केली असता त्याने यासंदर्भात कबुली दिली. दहिवडी पोलिसांनी सदरील दागिने हस्तगत करून मूळ मालकाला परत दिले यावेळी त्यांनी श्री दराडे व दहिवडी पोलीस स्टाफ चे आभार मानले.

     या सातही गुन्ह्यांमध्ये दहिवडी पोलिसांनी आपल्या काटेकोर तपास,स्थानिक माहिती तंत्रज्ञानाचा योग्य वापर आणि नागरिकांच्या सहकार्याने अवघ्या काही दिवसात चोरी गेलेल्या मालमत्तेच्या शंभर टक्के शोध घेतला.ही मालमत्ता संबंधित मालकांना परत करण्यात आली .

      या सर्व उल्लेखनीय कामगिरीची दखल सातारा जिल्हा पोलीस अधीक्षक यांनी घेवून दहिवडी पोलीस स्टेशनला “सर्वोत्कृष्ट चोरीस गेलेली मालमत्ता हस्तगत पुरस्कार” प्रदान केला.

यावेळी पोलीस अधीक्षक तुषार दोशी म्हणाले, दहिवडी पोलिसांचे हे कार्य संपूर्ण जिल्ह्यासाठी प्रेरणादायी आहे. चोरीचे प्रकार रोखण्यासाठी आणि गुन्हेगारांना पकडण्यासाठी त्यांनी दाखवलेली तत्परता व कार्यकर्तव्यनिष्ठा ही आदर्शवत आहे.भविष्यात ही अशीच कामगिरी अपेक्षित आहे.

     सपोनि दत्तात्रय दराडे व दहिवडी पोलिस स्टेशनच्या सर्व स्टाफने केलेल्या या विशेष उल्लेखनीय कामगिरीबद्दल दहिवडी व पंचक्रोशी सह जिल्ह्यातून दहिवडी पोलिसांचे अभिनंदन होत आहे,नागरिक कौतुक करत आहेत.