किल्ले श्री महिमानगडावर श्री शिवप्रतिष्ठान हिंदुस्थान यांची रविवार दि.२९ जून वृक्षारोपण मोहीम ! या मोहिमेसाठी मोठ्या संख्येने उपस्थित राहावे आयोजकांचे आवाहन…

वृत्त दि. – २७ जून २०२५

वृत्त – सातारा.

    श्री शिवप्रतिष्ठान हिंदुस्थानच्या वतीने महाराष्ट्रभर वृक्षारोपण,स्वच्छता व गड संवर्धन मोहीम आखण्यात आली आहे. या मोहिमेचा अनुसरून श्री शिवप्रतिष्ठान हिंदुस्थान ‌माण – खटाव, जि.सातारा यांच्याकडून माण तालुक्यातील किल्ले श्री महिमानगड येथे रविवार दि.२९ जून रोजी सकाळी ८ ते दुपारी ३ या दरम्यान हे वृक्षारोपण होणार आहे.

    या वृक्षारोपण मोहिमेत दिवसभरामध्ये २५१ हून अधिक वटवृक्ष लावण्याच्या संकल्प संघटनेच्या वतीने करण्यात आला आहे. पर्यावरणाच्या जतन,संवर्धन आणि संरक्षणाबरोबरच “छत्रपती श्री शिवाजी महाराजांचा खरा इतिहास जनतेपर्यंत पोहोचावा आणि त्यांच्या किल्ल्यांचा ठेवा सुस्थितीत राहावा, आपला ऐतिहासिक वारसा भावी पिढीला समजावा यासाठी हा उपक्रम सुरू केला आहे” असे श्री शिवप्रतिष्ठान हिंदुस्तान यांच्याकडून सांगण्यात येत आहे. या मोहिमेसाठी येताना प्रत्येकाने स्वतःला दोन वेळ पुरेल असा जेवणाचा डबा आणि पिण्यासाठी पाणी घेऊन येणे आवश्यक आहे. याशिवाय खुरपे,कुऱ्हाड यांसारखे वृक्षारोपणासाठी आवश्यक असलेले साहित्य उपलब्ध होत असेल तर घेऊन यावे. श्री महिमानगड पायथा या ठिकाणी मोहिमेसाठी एकत्र येऊन या मोहिमेस सुरुवात होणार आहे.

     या मोहिमेसाठी सातारा जिल्ह्यातील तमाम धारकरी,गडसेवेकरी,पर्यावरण प्रेमी,सुजाण नागरिकांनी तसेच सकल हिंदू समाज बांधवांनी आवर्जून मोठ्या संख्येने उपस्थित रहावे. असे विनम्र आवाहन श्री शिवप्रतिष्ठान हिंदुस्तान यांच्या वतीने महेश पवार,रोहन कदम,अजय बर्गे,हभप महेश माने महाराज, साकेत जाधव आणि ओंकार गाढवे यांनी केले आहे.

      ही वृक्षारोपण मोहीम राबवण्यासाठी श्री शिवप्रतिष्ठान हिंदुस्तान, ग्रामपंचायत महिमानगड, बा रायगड परिवार आणि विशेषत्वे दहिवडी पोलीस स्टेशन दहिवडी यांचे सहकार्य लाभत आहे.