स्थानिक स्वराज्य संस्थांच्या निवडणुका ताकदीने लढणार, महाविकास आघाडीची मोट बांधणार : अभयसिंह जगताप

वृत्त – माण,खटाव, सातारा.

वृत्त दि. – बुधवार, १५/०९/२५

    राष्ट्रवादी काँग्रेस शरदचंद्र पवार पक्षाचे अध्यक्ष खासदार शरद पवार, प्रदेशाध्यक्ष शशिकांत शिंदे यांनी माझ्याकडे माण-खटावची जबाबदारी सोपवली. सामान्य जनतेशी संवाद साधून पुन्हा एकदा पक्षाची बांधणी करणार असून, सर्व स्थानिक स्वराज्य संस्थांच्या आगामी निवडणुका महाविकास आघाडीच्या माध्यमातून ताकदीने लढणार असल्याचा निर्धार माण-खटावचे नेते अभयसिंह जगताप यांनी बुधवार दि. १५ ऑक्टोंबर रोजी दहिवडीत आयोजित पत्रकार परिषदेत केला.

    श्री.जगताप म्हणाले, “गेल्या वर्षभरात अनेकांनी पक्षांतर केले, तसेच करणार असल्याने माण-खटावमध्ये विरोधकच नाही, अशी परिस्थिती निर्माण झाली होती; परंतु शिव,शाहू,फुले,आंबेडकरांचा विचार तळागाळात पोहोचलेला असून, एक लाखांपेक्ष जास्त मतदारांनी आम्हाला मतदान केले होते. तो विचार घेऊन आम्ही जनतेकडे जाणार आहोत. शरद पवारांनी केलेल्या कामामुळे अजूनही जनता त्यांना मानते.महाविकास आघाडीसोबत भाजपच्यविचारांच्या विरोधात असलेल्या शेतकरी संघटना, रासप, वंचित यांना घेऊन आम्ही निवडणुकांना सामोरे जाणार आहे.अजित पवार गट आणि शरद पवार गट एकत्र लढणार असल्याच्या अफवांचे स्पष्ट शब्दात खंडन केले. कोणत्याही परिस्थितीत आम्ही अजित पवार गट किंवा महायुतीच्या घटक पक्षांशी युती करणार नाही, असे त्यांनी ठामपणे सांगितले.

जिल्हा परिषदेचा कुकुडवाड गट सर्वसाधारणसाठी खुला झाल्याने ते स्वतः निवडणूक लढविण्यास इच्छुक असल्याचे त्यांनी सांगितले.याबाबत चर्चा करून पुढील निर्णय घेतला जाईल, असे त्यांनी नमूद केले.

     विचारांशी बांधील कार्यकर्त्यांना एकत्रित करून प्रशिक्षित करणार. आम्हाला जय पराजयाची तमा नाही.अभय जगताप जनतेला व कार्यकर्त्यांना कधीही एकटा पडू देणार नाही, धर्मांधतेकडे घेऊन जाणारा विचार या देशाचं कधीही भलं करणार नाही.देशाची जगात प्रचंड मानहानी झाली असून आपली हुकूमशाहीकडे वाटचाल सुरू आहे. तरुणांनी शिव,शाहू,फुले,आंबेडकर यांचा सुधारणेचा विचार घेऊन मैदानात उतरलं पाहिजे.आम्ही चांगला लढा देणार असून, आगामी पंचायत समितीवर आमच्याच विचारांचा झेंडा लागेल, याची खात्री आहे असा विश्वास त्यांनी व्यक्त केला.