म्हसवड नगरपालिकेत शेखर गोरे यांची दमदार एन्ट्री ! सौ. गौरी माने यांचा नगराध्यक्ष पदासाठी अर्ज दाखल

वृत्त – म्हसवड,ता.माण,जि.सातारा.

वृत्त दि. – शनिवार, १५ नोव्हेंबर २०२५

    नगरपरिषद निवडणुकीच्या पार्श्वभूमीवर शहरातील राजकारण चांगलेच तापू लागले आहे. शनिवार दि.१५ नोव्हेंबर रोजी उमेदवारी अर्ज दाखल करण्याच्या पाचव्या दिवशी माणचे युवा नेते व सातारा जिल्हा बँकेचे संचालक शेखरभाऊ गोरे यांनी म्हसवड शहरात भव्य शक्तीप्रदर्शन करीत दमदार एन्ट्री घेत आपल्या गटातील सात उमेदवारांचे अर्ज दाखल केले. यामुळे निवडणुकीच्या रणधुमाळीत प्रचंड खळबळ उडाली आहे.

        पालिका निवडणुकीला रंग चढण्याची खरी सुरुवात झाली, असेच या घटनाक्रमावरून स्पष्ट दिसून आले. यापूर्वी भाजप व विरोधी गटांकडून कोणत्याही उमेदवारी अर्जाची नोंद न झाल्याने शहरात सस्पेन्सचे वातावरण होते. अशा परिस्थितीत शेखर गोरे यांनी अचानक मैदानात उतरून म्हसवडच्या राजकारणात मोठी हलचल निर्माण केली आहे.

        राजकारणातील आपली भूमिका स्पष्ट करत गोरे यांनी ही निवडणूक कोणत्याही परिस्थितीत लढण्याचा निर्धार व्यक्त केला होता. त्यांच्या प्रवेशानंतर निवडणुकीतील समीकरणे ढवळून निघाल्याचे चित्र दिसत आहे. माणच्या राजकारणातील ‘वादळ’ म्हणून ओळखले जाणारे गोरे यांची एन्ट्री ही निवडणुकीतील आजवरची सर्वात मोठी घटना म्हणून पाहिली जात आहे.गोरे गटाने नगराध्यक्ष पदासाठी माजी नगराध्यक्ष विलासराव माने यांची सुनबाई सौ. गौरी विशाल माने यांचा उमेदवारी अर्ज दाखल केला. त्यांच्या मैदानात उतरण्यामुळे नगराध्यक्ष पदाच्या निवडणुकीत चुरस वाढण्याचे संकेत मिळत आहेत.

‌ याशिवाय विविध प्रभागातून गटाने हे अर्ज दाखल केले :

प्रभाग क्र. १ – सोमनाथ अजिनाथ कवी

प्रभाग क्र. २ – किर्ती आनंदा मासाळ

त्याच प्रभागातून – आनंदा महादेव मासाळ

प्रभाग क्र. ३ – विक्रम लोखंडे

प्रभाग क्र. ५ – मोनिका महेश लिंगे

प्रभाग क्र. ७ – प्रतिक्षा सोमनाथ कवी

प्रभाग क्र. ८ – धनाजी रामचंद्र माने

       अशा सात उमेदवारांचे अर्ज आज दाखल करत शेखर गोरे यांनी आपली निवडणूक तयारी जाहीर केली.‌ गेल्या चार दिवसांत कोणत्याही पक्षाकडून उमेदवारी दाखल न झाल्याने निवडणूक रम्य होण्याची चिन्हे दिसत नव्हती. निमित्ताने म्हसवडमधील पालिका निवडणूक खऱ्या अर्थाने रंगतदार होण्याची सुरुवात झाली असून, आगामी दिवसांत राजकारणाचे तापमान आणखी वाढण्याची चिन्हे स्पष्ट दिसत आहेत.