शिखर शिंगणापूर यात्रेसाठी दहिवडी पोलिसांचा चोख बंदोबस्त ; भाविकांच्या सुविधेसाठी वाहतूक मार्गात मोठा बदल !

वृत्त – माण,सातारा.

छत्रपती श्री शिवाजी महाराजांचे कुलदैवत असणाऱ्या माण तालुक्यातील दहिवडी पोलीस स्टेशनच्या हद्दीतील शिखर शिंगणापूर येथील श्री शंभू महादेव देवाची वार्षिक चैत्री यात्रा २३ मार्च ते २ एप्रिल अखेर होत आहे. या यात्रेतील मानाच्या कावडीचा मुख्य दिवस ३० मार्च आहे.या दिवशी भाविकांची होणारी मोठी गर्दी लक्षात घेऊन भाविकांची गैरसोय होऊ नये म्हणून सातारा जिल्ह्यातील सर्व प्रशासकीय आस्थापना सज्ज झालेल्या पाहायला मिळत आहेत. सातारा पोलीस प्रशासनाने शिखर शिंगणापूर ते फलटण मार्गावरील वाहतुकीत महत्त्वपूर्ण बदल केले आहेत.

पोलीस अधीक्षक तुषार दोषी यांनी महाराष्ट्र पोलीस अधिनियम १९५१ च्या कलम ३४ अन्वये प्राप्त अधिकारांचा वापर करून हे आदेश जारी केले आहेत. हे बदल ३० मार्च २०२६ रोजी सकाळी ६:०० ते रात्री ११:०० वाजेपर्यंत लागू राहतील.

वाहतुकीतील प्रमुख बदल

पर्यायी मार्ग: शिखर शिंगणापूरकडून फलटणकडे जाणारी सर्व प्रकारची वाहतूक शिखर शिंगणापूर – दहिवडी – मोगराळे घाट – फलटण किंवा शिखर शिंगणापूर – नातेपुते – बरड – फलटण अशी वळवण्यात आली आहे.एकेरी मार्ग: शिखर शिंगणापूर – कोथळे – कर्णेवाडी – आंदरुड – फलटण या मार्गावरील वाहतूक पूर्णपणे एकेरी करण्यात आली आहे.

पोलीस प्रशासनाचे आवाहन

यात्रेच्या मुख्य दिवशी शिखर शिंगणापूर ते फलटण मार्गावर पायी चालणारे भाविक आणि कावडींची मोठी संख्या असते. वाहतूक कोंडी टाळण्यासाठी आणि प्रवाशांची गैरसोय रोखण्यासाठी हे बदल करण्यात आले आहेत. ज्या ठिकाणी वाहतूक वळवण्यात आली आहे, तिथे चोख पोलीस बंदोबस्त तैनात करण्यात आला आहे. सर्व नागरिक, भाविक आणि वाहन चालकांनी या बदलांची नोंद घेऊन पोलीस प्रशासनाला सहकार्य करावे, असे आवाहन सातारा पोलीस दलातर्फे करण्यात आले आहे.